《今晚Tip馬夜唔夜》初三賀歲賽猛料大放送

每次睇排完位,覺得刨馬太多資料好花精神?有太多心水馬,唔買得咁多隻嘥本錢,而熱門馬則回報率低冇肉食,點算好呢? 嚟緊下周一年初三(27日)沙田馬場將跑11場賀歲日賽,究竟各場邊隻馬贏得? 唔使你嘥時間刨,我哋一班高學歷年輕評馬精團隊,將精心分析向大家提供心水馬。 《蘋果動新聞》周四(23日)節目《今晚Tip馬夜唔夜》就可以幫到你。 每次《今晚Tip馬夜唔夜》都有三位年輕評馬人,幫馬迷逐場逐匹點評整懶人包,唔使自己刨得咁辛苦。 由於賽馬節目主持兼評馬人黃楨淘呢期去咗辦年貨;所以《競馬Fact Check》主持馬場姐姐Charene胡詩傲客串一期,聯同評馬人GM張凌良,以及《馬後炮》主持Dylan一齊同大家Tip馬仔。 周三(22日)谷草夜賽有跟實三位評馬人貼士嘅馬迷,相信獲利甚豐,因為網軍代表Homan第四場貼中「一舖成名」單式馬膽拖六腳,四重彩10蚊一注派15,519元,真正中到啪啪聲! 至於GM張凌良第五場亦中28倍冷Q,相當爭氣,兩位一口氣收復唔少失地,逼到原本一直領先嘅黃楨淘氣咳,事關佢中第六場條Q僅為7.5倍,相對另外兩位對手稍稍失色! 想知今期三位主持又有咩心水猛料畀大家?記得入嚟重溫《今晚Tip馬夜唔夜》。
今晚Tip馬夜唔夜