【全球樓行】單身中女賣港樓 揸600萬移居東京炒樓

本身在銀行界工作多年的陳婉玲(Elaine),與不少港人一樣鐘情日本文化,近年廉航普及,更差不多一年赴日本數次。最近銀行業盛景不再,她不幸由長工轉為合約。仍未結婚的她,眼見事業愛情兩失意,去年決定把心一橫,辭去銀行工作,隻身移居東京讀日文,更將在港的物業放售,手持600萬,赴日即full pay掃東京一單位。

她透露在2008年購入沙田一大型屋苑600呎單位,於去年出售,購入價約200多萬,累計升幅已經有三倍多,她指現時香港樓真係太高:「再升上去,機會唔係話咁大。」加上仍持有物業,礙於辣招關係,決定轉戰日本市場。

Elaine坦言看淡本港樓價,反而對東京樓市前景感到樂觀:「日本樓易睇啲就係因為(經濟)復蘇緊嘛,即係仲有空間升。」甫到東京數月,Elaine已先以1480萬(約106萬港元)購入一開放式單位,她指:「依家係奧運之前嘛,我睇好依段時間會再升啲,我都唔急住放。」

明言「唔鐘意好油嘅廣東菜、無掛住茶餐廳、但日本嘢食就好鐘意」的她,已打算於當地落地生根:「如果日文讀得好,打算直情留喺度發展!」Elaine早對將來躊躇滿志:「我銀行有經驗,加上中、英文,喺依度應該幾吃香。」更指已有日本公司在網上邀她加入,「就算搵唔到長工,做兼職都有啲機會!」表明香港還有物業的她,更表明不排除再賣港樓買日樓:「一間自住、一間放租,如果合適嘅話會再買多間放租。」

除了事業,她亦為自己的姻緣打算,以往日本時有家暴新聞、加上日男「大男人主義」根深蒂固,Elaine就坦言對日男有不少憧憬:「我唔覺得佢哋大男人囉,我依家識朋友都以日本人優先,佢哋有啲真係唔識英文,只可以用日文溝通,咪可以進步啲!」有指日本拍拖行AA制,她即搶答:「我都係唔使畀錢嘅!」她透露不少日男都喜歡國外見聞,港女有一定的優勢,愛情是否目標之一 ?她即化身小女人回答:「個個人都係想依啲嘢架啦,我唔會例外囉…依個世界咩事都會發生,我唔會畀限期自己!」

記者:梁延宇
攝影︰周智堅

全球樓行 Dream House零距離
https://hk.feature.appledaily.com/overseasproperty


Elaine指,到日本留學差不多一年,打算到畢業後到當地長住。

Elaine指,到日本留學差不多一年,打算到畢業後到當地長住。