旅行團全數蒸發 韓旅行社港男老闆未驚過：韓國政府幫到手

初認識在韓國落地生根的香港人Andy Lam時，他已經是一位相當冷靜的導遊，多年後身份由導遊變成當地旅行社老闆，再遇已是武肺令旅遊界變天之時。2月開始疫情爆發，旅遊業收入一併進入真空期，Andy做老闆同時是一家之主，擔帶多了，要解決的問題也多了；幸運的是，Andy面對衝擊仍能夠保持一貫冷靜，EQ高自是個人修為，但韓國政府果斷解決問題的政策，令旅遊業老闆及員工都可以安心！

Andy是韓國在地旅行社「Together Travel 」的老闆，承包香港旅行社到韓的導遊服務，今年1月20日出現首宗武漢肺炎感染個案，事件卻未為大眾所關注。Andy憶述：「1月已經知有武漢肺炎，但都未有對旅客有影響；直到2月，大概農曆年後，疫情變得嚴峻，滑雪團相比上年跌咗70%；4月櫻花團就更加唔使講，全部取消。4－6月係我哋做交流團、考察團旺季，日子係咁過，一個一個團相繼延遲，直到現在係完全取消。」雖然韓國最嚴重的疫區是大邱和慶尚北道，但一為防止疫情擴散，二為條例所限，旅行社不能做本國人的「本地遊」生意，想像得到作為老闆有多頭㾗。

頭痕歸頭痕，即使初期的防疫措施薄弱，疫情廣為擴散令韓國政府備受抨擊，然而亡羊補牢，及後的疫情管理，加上各種救市方案，國際輿論對韓國政府的評論由貶到褒來個大反轉，Andy同時是救市受惠者：「收入完全冇進賬，令人安心嘅係政府同埋旅遊業界幫旅行社支薪畀員工，政府佔7成，業界佔3成，由3月可以申請，約2個月可以收到錢。另一件事值得一讚，就係政府發放低息貸款，由7千萬至1億韓圜（約44－63萬港元），對我哋呢啲中小企實在大有幫助。」縱使韓國人經歷過沙士、MERS，根據他的觀察，武漢肺炎初期韓國人仍抗拒戴口罩，亦有人隨地吐痰，但經過官方宣傳，到現階段民眾已經習慣戴口罩，也少見了隨地吐痰的人。

申請政府津貼的其中一個條件，是要旅行社的員工不用回公司上班。跟全世界一樣，Andy及同事都一起work from home，Andy 笑道：「韓國旅遊業咁勁，平時四圍走都未停過，而家可以陪下啲細路同屋企人，多咗好多親子時間。韓國冇限聚令，我覺得自己啲麻雀技能提高咗；有啲朋友就學咗煮咖啡，有啲又整下叉燒、燒賣呀點心咁，我估疫情過後應該都會多咗啲點心舖，個個都學咗新嘢！咁講工作方面，有啲朋友平時都係點下頭，而家就多咗好多時間同佢哋傾得深入啲，多咗了解佢哋有咩才華，開展合作機會。呢段時間我又發現好多香港人喺韓國開餐廳做貿易咁，但係韓國啲中華料理，好少係港式，所以都會考慮投資做港式食肆。」

然而說到本行，Andy表示不太擔心：「當年沙士都經歷過V形反彈，只要公司本身資金充足，也有準備，就能過渡甚至追番業績。但希望韓、港政府盡快解除14日隔離政策，航空公司可以提供超優惠價畀旅行社，旅客就有更大誘因出門，更快振興韓國觀光事業！」



點擊瀏覽更多疫市旅人：

64年沙田「空中飛傭」傭仔兩度失業 捨空少包袱轉型做mean精KOL：條片係好多like，但之後呢？

節目開拍無期 轉型拍片講動物 背遊達人梁彥宗：冇打算完全轉行

撰文：聽葡

編輯：吳允、鄒仲安

-----------------------------

改善睡眠質素．助你安神減壓

《保健精讀：失眠》 秒速入眠

-----------------------------

抗病經歷・醫護報料

歡迎分享到《健康蘋台》報料專線： https://bit.ly/2vPHzrT