旅遊廣告跌至零里數KOL變退機票達人小斯：唔好貪着數退credit

21 May 2020

小斯擁有兩大旅人社交平台，除了以「小斯」為名的Facebook專頁講旅遊里數攻略外，還有另一旅遊資訊平台「Flyday.hk」，精明的旅人們總會看過。人算不如天算，算得盡飛行里數的他，又如何想得到2020年的今天，會遇上令全球方寸大亂的武漢肺炎？4個月旅遊廣告全數蒸發，數口精的他識得變通自能在疫境中守住生計。外遊路不通，轉而捕實本地優惠，又殺出一條新血路﹗

本地遊反應空前力谷親子遊與餐飲優惠

小斯一路順着潮流走，旅遊資訊出不了，令2和3月專頁流量急跌，但大家生活仍是要過的。疫情初期推出本地玩樂優惠都有鼓吹消費之嫌，雖然他說followers都很客氣，未必一出feed就開罵，但小編們也自律忍手，不寫外遊玩樂feed。隨着本地疫病確診數字下降，限聚令鬆綁，本地消費需求急增，平日只佔生意額一成左右的本地酒店及餐飲業的廣告約有6倍增長，「本地酒店的住宿、餐飲優惠反應前所未有地好。」現時的帖文以本地酒店與飲食優惠佔九成，餘下是信用卡優惠資訊。

平日唔憂賣的酒店現在只能吸納本地客，推出的海嘯價優惠幾乎等如食一餐送一晚住宿，「睇番數據嚟講，米芝蓮餐廳、大牌子酒店幾廿年都冇做過優惠。」當了KOL 6年，據他觀察，香港酒店專做熟客，根本不着重在港推廣，但現時為勢所迫，酒店、商場都主動向他搵合作，「你問我而家會唔會得閒咗？我又唔覺得會囉﹗」港人累積了的購買力隨着限聚令鬆綁而爆發，「優惠推出，大家蜂擁去買，反應比前幾年更加好﹗」自稱半個媒體的他，本身主力去刁鑽地方旅遊，如今亦要惡補本地酒店資訊開拓新市場，「酒店coupon冇日子限制，所有人見到都會買咗先。有酒店集團推出六折coupon，唔夠30分鐘已經賣晒﹗」證明到自己有影響力，自有本錢吸引客戶落廣告。

現金才是王道退Credit如軍票

原本「每月一旅」的他，本來4月計劃去大溪地、5月要去非洲，如今旅程泡湯，他分享第一身的機票退款經驗，波折重重。而身為旅遊精明眼，他的建議卻極其穩陣：「現時航空公司現金流不足，機票雖然可全數退款，但亦會提供退credit（退額）畀你，如＄100會退＄110 credit畀你用，但千祈唔好貪小便宜﹗Credit就等如軍票﹗拎上手都係可能廢嘅，如果出事換cash最實際。」他更補充，如遇上旅行社執笠，可透過小額錢債審裁處，或信用卡退款保障（charge back）追討損失。手上如有幾個月後出發的機票，他建議要靜觀其變，不要急於一時退款，待航空公司有免手續費的退款機制推出時才申請退款還未遲。

封城資訊彈弓手秒秒鐘捕住Update

回想2月中開始各國陸續封關，旅遊癮旺盛的香港人插翅難飛，小斯的專頁寫好準備出街的news feed都被截停，旅遊廣告更全數蒸發，小斯：「2月底到4月中，旅遊界問價、查詢嘅客係零！完全停擺，有啲延遲廣告，到而家為止都仲未可以出街。」所有資訊都變為封城速報，他和同事由捕住旅遊優惠轉向捕住疫情及出入境限制資訊、航空公司改機票或退票辦法，「泰國、越南嗰啲都幾難做fact check，我哋唔可以慢又唔可以錯，你記唔記得泰國入境政策，一日已經變幾次，覺得自己似做國際新聞版面。」但他仍有餘暇去撲口罩，「我同同事home office期間已經沒有『日常工作』，大家由搶機票變撲口罩，你知嗰陣幾難搵，真係神經緊張，我哋搵到批印度口罩好開心，收貨時一打開，一層薄到呢，睇到肉，伏咗囉，而家睇番相都覺得好笑！」最後有社工聯絡他，認為可捐給腎病病友，一番心機最終沒有白費，皆大歡喜。

節目開拍無期轉型拍片講動物背遊達人梁彥宗：冇打算完全轉行

製片：Eve Chong

撰文：聽葡

攝影：伍永健

編輯：吳允、鄒仲安

嗚謝：香港維港凱悅尚萃酒店、北角匯

-----------------------------

糖尿病飲食指南低糖餐單大公開

穩定血糖全靠《控糖天書》

-----------------------------

抗病經歷・醫護報料

歡迎分享到《健康蘋台》報料專線：