港仔旅居台灣拍旅遊宣傳片無懼淡市油麻地開店變咖啡師

11 Jun 2020

台灣

都說水瓶座有革命精神，就像港仔Andy（何卓謙），還不到30歲，突破自己已經是日常，裸辭記者工作到台灣研習咖啡，旅居當地為台灣不同單位拍攝旅遊宣傳片，做活動策劃。港台兩邊走的身份遇上疫情，還有勇氣開新店，卻絲毫不緊張，更豪言是上天給他的發揮機會，初生之犢就連武漢肺炎都冇有怕！

旅遊短片全泡湯

台灣宣佈封關前，剛巧那段時間Andy要到台灣處理宣傳片拍攝事宜，見識到台灣防疫的嚴謹。Andy客群多是旅遊業界，2月到10月的短片拍攝全數給武漢肺炎攔下來。旅遊收入歸零，短片製作都交給相熟的朋友延續。生意事小，令Andy最難釋懷的是對朋友的思念，坦言台灣朋友跟香港朋友的相處方式不同，台灣人都很熱情，Andy也以熱情回報：「好唔慣冇得同佢哋一齊玩，我真係會請假空出一日同佢哋過生日，慣咗成日出嚟同佢哋聚下、飲下嘢，而家網上見變番Online用text溝通，其實都掛住佢哋嘅。」

疫情高峰期開舖

朋友之所以重要，要回帶數年前，港仔Andy是獨自到台灣學咖啡的，台灣朋友對他的好，他都記住。Andy不負自己努力，去年成立了咖啡豆品牌「厚啉。咖勹一」，遊走城中市集推廣咖啡。因緣際會，大學師兄得悉，就邀請他進駐新開的Art Pub，負責咖啡的部份，油麻地的一幢藝術酒店頂樓的「room 68」因而誕生，而且是在疫情嚴峻的3月中！這令人想起逆流三文魚！市道蕭條，還有信心？Andy：「我熱衷打逆境波，最有影響係禁酒令，4月3日的禁酒令，令餐牌嘅酒完全唔可以賣。我同拍檔Ericsson就上網搵唔同嘅食譜，幾日內構思咗兩款飲品——陳年‧履事、糖醋咖勹一，兩款嘅Presentation都似Cocktail，咖啡豆的味道都係特別選擇，會聯想到酒，而估佢唔到係變咗我哋最受歡迎飲品！」將咖啡配陳皮、薑粒，你萬萬想不到咖啡在他們手中會呈現到東方味道！

時間多技術突飛猛進

Andy補充，說在疫市當中，有朋友也以低廉租金租到不錯的舖位，最壞的時候也會有好事發生。另一件「好事」，也包括自己的進步，拍檔Ericsson以第三者角度說：「Andy嘅技術是由零點幾到一百萬，可以話突飛猛進，之前佢唔太熟用意式咖啡機，但經歷呢幾個月，完全可以駕馭。」投入時間除了技術上的精進，還有意外收穫。Andy：「大家的時間都多了，如果冇疫情，客人可能坐一陣就走。而家大家步伐慢咗，我哋多咗時間了解客人對咖啡、飲食方面嘅喜好。」

多方向發展密食當三番

對於前景，Andy抱着踏實的態度，疫情、社會前景未明，甚至連東非咖啡豆也遭受蝗蟲之害，一如所有人一樣，多多少少對其業務有影響，進取的他不採取「見步行步」姿態，Andy：「未來都會擺市集，或者考慮下網上賣豆同研究下啲咖啡粉，至於短片方面，會睇下香港有冇其他片可以拍，哈哈！以前大雞唔食細米，而家都要密食當三番啦！」天塌下來不一定當被冚，但願Andy逆流而上的智慧和努力，比病毒更強的感染開去。

點擊瀏覽更多疫市旅人系列：

港仔旅居台灣拍旅遊宣傳片無懼淡市油麻地開店變咖啡師

旅遊廣告跌至零里數KOL變退機票達人小斯：唔好貪着數退credit

Room 68

地址：油麻地砵蘭街68號東南樓23樓

厚啉。咖勹一

網址： https://www.facebook.com/holim.coffee

撰文、攝影：聽葡

編輯：吳允、鄒仲安

-----------------------------

十大醫生專家教你紓緩濕疹

《保健精讀：濕疹》